Kryeministri i Shqipërisë, Edi Rama ka njoftuar për nënshkrimin e marrëveshjes duke thënë se në kuadër të kësaj marrëveshjeje shtohen edhe disa profesione të tjera, “duke lehtësuar më tej lëvizjen e profesionistëve dhe shfrytëzimin e potencialit të madh të burimeve tona njerëzore”. Liderët e Ballkanit Perëndimor të hënën kanë nënshkruar marrëveshjen për njohjen e ndërsjellë të kualifikimeve profesionale në kuadër të Procesit të Samitit të Berlinit që po mbahet në Tiranë.
Kryeministri i Shqipërisë, Edi Rama përmes një postimi në Facebook ka njoftuar për nënshkrimin e marrëveshjes duke thënë se në kuadër të kësaj marrëveshjeje shtohen edhe disa profesione të tjera, “duke lehtësuar më tej lëvizjen e profesionistëve dhe shfrytëzimin e potencialit të madh të burimeve tona njerëzore”.
Po ashtu në ambientet pranë Piramidës pas samitit të Procesit të Berlinit u përurua edhe Kolegji Europian në Tiranë.
Rektorja, Federica Mogherini u shpreh se aktiviteti i kolegjit do të nisë vitin e ardhshëm.
“Po e përurojmë sot në kuadër të samitit të Procesit të Berlinit këtu në Tiranën e bukur në këtë vendndodhje të mrekullueshme, zyrën e parë të kolegjit të Europës këtu në Tiranë që do të udhëheqë rrugën për ngritjen e degës sonë që do të nisë aktivitetet shtatorin e ardhshëm 2024-2025”, tha Mogherini.
Ajo u shpreh krenare për këtë arritje.
“Pas kësaj zyre do të kemi rezidencën për studentët, klasat dhe objektin për të nisur mësimdhënien vitin e ardhshëm”, u shpreh ajo.
Sipas Mogherini-t kolegji do të sjellë studentë nga i gjithë rajoni, ndërsa theksoi se diploma do të jetë e akredituar nga autoritetet holandeze.
Ndërsa kryeministri i Shqipërisë, Edi Rama e quajti “të mahnitshme” hapjen e këtij kolegji.
Ai ka falënderuar të gjithë liderët e BE-së që ishin të pranishëm duke thënë se “BE-ja është bekim i madh për të gjitha vendet tona, burimi më i thellë i dijes se si të ndërtohen institucionet, janë institucionet ato që bëjnë dallimin”.
“Dua të falënderoj të gjithë me zemër, të gjithë ata nga BE-ja që janë këtu sepse vetëm prania juaj fizikisht, shpenzimi i gjithë kësaj dite me ne është dhuratë që ne shqiptarët e çmojmë shumë sepse u izoluam nga bota për shekuj të tërë, nuk patëm mundësi të zgjedhim se me kë duam të ishim”, ka thënë Rama.
Ndryshe, të hënën u mbajt samiti i Procesit të Berlinit në Tiranë.
Kjo është hera e parë që një takim i procesit të Berlinit organizohet jashtë kufijve të BE-së.
Hapja zyrtare e samitit u bë me fjalimet e kryeministrit të Shqipërisë, Edi Rama, shefes së KE-së, Ursula von der Leyen, dhe presidentit të Këshillit Evropian, Charles Michel.
Leave a Reply